დელიქტი არის მართლსაწინააღმდეგო ქმედებით სხვისთვის ზიანის მიყენება, როდესაც ამ ქმედებასა და დაზარალებულს შორის ხელშეკრულებითი ურთიერთობა არ არსებობს.
განსხვავებით ხელშეკრულებითი ვალდებულებისგან (როცა მხარეები წინასწარ თანხმდებიან პირობებზე), დელიქტი მოულოდნელად წარმოიშობა. მაგ: თუ მეზობლის უყურადღებობის გამო (მაგალითად, წყალი ჩამოგივიდათ) თქვენი ბინა დაზიანდა, შეგიძლიათ მოითხოვოთ რემონტის ხარჯების ანაზღაურება.
იმისთვის, რომ დელიქტური პასუხისმგებლობა დადგეს და ზიანი ანაზღაურდეს, აუცილებელია ოთხი ძირითადი პირობის ერთობლიობა:

1. ზიანი - უნდა არსებობდეს რეალური, შეფასებადი ზიანი. ეს შეიძლება იყოს ქონებრივი (მაგალითად, გატეხილი ფანჯარა, დაზიანებული მანქანა) ან არაქონებრივი (ფიზიკური ტკივილი, მორალური ტანჯვა, რეპუტაციის შელახვა);
2. მართლსაწინააღმდეგო ქმედება - ზიანი მიყენებული უნდა იყოს ქმედებით (ან უმოქმედობით), რომელიც ეწინააღმდეგება კანონს, სხვა სამართლებრივ ნორმას ან ზნეობრივ მოთხოვნებს;
3. ბრალი - ზიანის მიმყენებლის ქმედება უნდა იყოს ბრალეული. ეს ნიშნავს, რომ მან ზიანი მიაყენა განზრახ (უნდოდა ზიანის მიყენება) ან გაუფრთხილებლობით/დაუდევრობით (არ გამოიჩინა სათანადო გულისხმიერება და სიფრთხილე).
4. მიზეზობრივი კავშირი - ზიანი უნდა იყოს მიყენებული სწორედ ამ მართლსაწინააღმდეგო და ბრალეული ქმედების შედეგად (ქმედება რომ არ ყოფილიყო, ზიანიც არ დადგებოდა).

დელიქტური ვალდებულებების ინსტიტუტი დაზარალებულს აძლევს სამართლებრივ მექანიზმს, მოითხოვოს ზიანის სრული ანაზღაურება. ეს ნიშნავს, რომ ზიანის მიმყენებელმა უნდა აღადგინოს ის მდგომარეობა, რომელიც იარსებებდა, ზიანი, რომ არ დამდგარიყო.
დელიქტური ვალდებულებები თქვენი სამართლებრივი უსაფრთხოების მნიშვნელოვანი გარანტიაა. ის უზრუნველყოფს, რომ არ დარჩეთ უსამართლოდ დაზარალებული სხვისი დაუდევრობის ან მართლსაწინააღმდეგო ქმედების გამო. ეს მექანიზმის გეხმარებათ, დაიცვათ თქვენი უფლებები და მიიღოთ კუთვნილი კომპენსაცია.